今年日本立山黑部將於四月十五號正式開山,介時無論當地人定外國人都必定會走嚟欣賞,尤其係著名嘅地標,兩邊成十幾米嘅雪牆呢幕經典景象。

不過大家都有啲對立山黑部有所陌生,雖然交通上係方便,但究竟係點樣先真正去到雪牆嘅地方?官方指定嘅六種交通工具係有咩關係呢?立山黑部嘅行程應該點樣安排?希望透過上年自己一個人去過嘅經驗,同大家分享點樣先可以喺立山黑部玩得最化算。

(1)認識立山黑部

其實立山黑部係兩個完全唔同嘅地區嚟,一個叫立山,係一個山嚟,而大家會喺雪牆經過就係呢個地方。另一個就叫黑部,係一個離開咗立山山上嘅地方,而黑部最著名就係黑部湖。所以立山黑部唔係一個地方,而係分開兩個地方,不過有交通可以直接去到。

(2)由邊度出發搭六種交通工具

由富山出發,

乘搭富山地方電鐵由富山站去立山站,然後開始乘坐六種山上交通工具。或者可以揸車到立山站,然後開始乘坐六種山上交通工具。

由長野/信濃大町出發,

乘搭巴士/揸車到扇澤,然後開始乘坐六種山上交通工具。

留意由富山出發會先到達立山嘅室堂,然後再去黑部湖;相反,由長野/信濃大町出發會先到達黑部湖,然後再去室堂。

(3)六種交通工具嘅特性

大家都睇到去立山同黑部係一定要搭佢哋指定交通公具,即係當中嘅六種交通。呢六種交通嘅關係嚴格嚟講係冇關係,即係呢六種交通佢哋嘅運作係獨立

每一種交通工具都有佢哋自己獨立嘅班次同時間表,而且呢六種交通公具都各自有獨自去程同回程嘅時間表。呢個概念一定要清楚,因為每搭完一種交通工具後,下一程嘅交通工具係需自己再等下一班,或者係幾班後嘅車,而要搭下一種交通工具嘅工作人員係唔會因為你搭完上一種交通工具而可以緊接另一種交通工具

(4)咁喺唔係就搭晒六種交通先到達立山同黑部呢?

其實唔係,呢六種交通每一種都係會方便你接近立山、黑部,同埋離開。意思係立山其實係非常大,每種交通都係喺立山裡面嘅範圍行走其中嘅部份,搭晒六種交通工具就會完成出發去立山、黑部,同離開立山、黑部。

所以,每一種交通工具以及佢哋嘅起點站到終點站要清楚留意。

(5)六種交通工具:

  • 黑部登山纜車(立山站<>美女平)
  • 立山高原巴士 (美女平–彌陀原–室堂)
  • 立山隧道無軌電車 (室堂 – 大觀峰)
  • 立山架空索道 (大觀峰 – 黒部平)
  • 黑部登山纜車 (黒部平 – 黒部湖)
  • 關電隧道無軌電車 (黒部水庫- 扇澤站)

睇呢張圖就會明白清楚:

(6)去邊度落車先係行程嘅重點

每一個落車位置其實都係一個景點嚟,但係記住一點一日時間絕對冇可能會睇晒所有立山、黑部嘅景點,一定要揀啲重要景點嚟睇。

嚟立山、黑部重點行得兩個落車地方,一個叫室堂(要記得呢個站),室堂就係睇雪牆嘅地方嚟。第二就係黑部湖(要記得呢個站),黑部湖係大水壩嘅地方,亦都係黑部重要景點嚟。

如果係睇雪嘅遊客,其他地點就可以唔駛去睇。美女平係山腰嘅地方嚟,普通一個山區樹林嘅模樣,所以唔值得嚟睇。彌陀原已經係積咗好多雪嘅地方嚟,雖然巴士都會停喺度可以落車,但周圍地方其實封晒,因為積晒雪唔俾你行,所以可以直接去室堂。

室堂係行程最重嘅落車站,就係睇嗰幅雪牆嘅地方嚟。喺室堂落車基本上有兩種活動,一就係圍住雪牆行一圈然後離開,第二係上室堂嘅地方行上山住民宿過夜,相信比較少人會去第二個活動。室堂係行程會花最多時間嘅地點,大約要留一至兩個鐘時間。

室堂至黑部之間有一個景點叫大觀峰,呢個地方可以落一落車一望,逗留時間大約十五分鐘左右,因為去嘅位置就係一個展望台,係行唔到其他地方。睇完之後就要離開去黑部湖。

黑部湖係另一個重要景點,其實佢係一個水壩嘅地方嚟,大約逗留時間約一個鐘。睇完就係坐巴士離開到扇澤呢個地方,然後再轉巴士去返JR長野站或JR信濃大町站。

搭完纜車之後搭巴士前往室堂。

室堂巴士站落車地方。

大觀峰展望台。

(7)行程嘅時間

開山其間係立山、黑部嘅高峰期,留意係人流係極之非常多人,特別係搭立山登山纜車,絕對極大機會要等至少等個半鐘時間,越遲嚟等候時間仲會越耐。所以絕對建議要早啲嚟到電鐵富山站,或者係去到扇澤站,建議時間為五點半至六點鐘。

我上次去到電鐵富山站都六點半,但結果等搭立山登山纜車都要一個鐘零四十五分鐘。我自己係八點九到立山登山纜車但票務職員話十點半先有得搭。所以越早越好,亦建議前一晚喺富山站附近住。

八種交通工具各自都有時間表同班次,不過當中時間表同班次就真係純粹參考,因為開山其間當日會有極大量遊客同時間到達,而且亦都有好多當地同外國旅行團一齊坐當中立山、黑部嘅交通工具。所以班次同時間表好難按自己需要安排行程,因為人多要實施人潮管制,而且亦都唔會因為人多而加密班次,特別係立山登山纜車、立山架空索道同黑部登山纜車。

另外一點亦都要非常留意,之前提及過,由於每一程交通係獨立營運,冇一個單位會負責確保你一定由立山、黑部返落嚟市區地方,尾班車開咗就冇,唔會等人,因為當中有遊客會喺立山住民宿過夜。所以絕對要睇時間,同埋預留更多時間去等車係絕對需要,特別係開山高峰期,以及每一程交通係獨立營運呢個概念一定要知。

朝早六點半富山站嘅情況。

根據被安排嘅班次同時間等候。

搭纜車上去人流非常多。

室堂站嘅人流。

離開黑部湖非常擠擁。

(8)建議行程安排

由電鐵富山站出發

最好嘅行程安排係大約六點左右到達電鐵富山站,其實呢個時候都開始有人等車。之後到達立山登山纜車即排隊拎飛等時間上纜車,同埋之後即刻排隊轉巴士前往室堂。喺室堂大約兩點鐘開始排隊離開,前往大觀峰同黑部湖,咁樣就絕對有足夠時間到達扇澤,然後搭巴士去返JR長野站或信濃大町站。

(9)有用嘅網站

 

====================

外部連結

====================

 


​​

自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 – 12/2016) ,分開17次時間,唔識日文情況下,自己一個人遊歷日本47個都道府縣。

☞ http://blog.ulifestyle.com.hk/blogger/ao37182/?p=2922849


​​

☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢!

☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。

有關各種關西地區嘅鐵路周遊券可以CLICK入去睇。

 http://blog.ulifestyle.com.hk/blogger/ao37182/?p=2936671

arrow
arrow

    ao37182557 發表在 痞客邦 留言(0) 人氣()