【Kansai Travel Focus 1 – Day2】2015-09-18 [值得嚟嘅程度 LEVEL 10/15]

尋晚喺神戶市食完神戶牛之後就返姬路市嘅酒店休息,然後呢日朝早天未光五點鐘起身,目的就係要去兵庫縣嘅竹田城跡。

 

天未光要出發

 

較好鬧鐘五點響,CHECKOUT出發去JR姬路站搭車。沿途條街仲係冇咩人,天都係暗暗哋嘅藍色,不過開漸漸淡色,準備日出嘅時候。

要咁早出發去嘅原因係竹田城跡當喺初初雲霧未散,就會可以睇到竹田城跡好似身處喺嗰雲層裡面,製造出天空之城嘅效果。不過,好可惜係當日落大雨,基本上個城跡俾啲雲封住咗。

 

不過起咗身都繼續出發啦,喺個JR站月台上只係見到少數人上車。由JR姬路站搭到去播但線道寺前站轉車。當我要轉車嗰陣唔知係唔係要轉對面月台,因為日本嘅月台通常幾個月台,加上寺前站係一個鄉郊嘅車站,見唔到啲指示邊個月台係去邊個方向,淨係見到對面月台有一部列車,個個乘客都係轉對面嘅列車。

雖說係咁但可能其他乘客並非同我去同一個方向,但時間冇多俾我去考慮,因為對面嘅列車好快要開。喺咁急嘅情況我都係跟大家去轉對面嘅列車,好彩最後都轉得啱。

 

落好大雨呀

 

去到竹田站之後要轉巴士去竹田城跡,不過一離開車站就落魚喇,而且都幾密。中途有職員喺我哋等巴士嘅時候叫我哋買巴士車飛,初初我唔知佢哋嚟做咩,走埋嚟我度,但我又唔明佢哋講咩。最開始我聽唔明佢哋所以笑笑口就話唔需要,但之後佢哋向其他等巴士嘅乘客講完之後,見到啲乘客俾錢佢哋,而佢哋亦同時俾張飛乘客。我望到先知原來佢哋喺賣巴士車飛嘅人嚟。所以我都走向前買咗張。

原來之後嚟嘅巴士係好細架仲細過啲小巴,所以喺車裡面係俾唔到錢,所以要等車前一早買定來回巴士車票。

大約廿分鐘就上到竹田城跡,一落車仲係好大雨。之後一直繼續行大約十分鐘左右嘅山路,即使有擔遮,但一直行一路落雨都幾狼狽。當時個背囊表面嗰部份都濕晒,甚至裡面啲嘢都濕埋。

 

白矇矇嘅竹田城跡

 

去到門口買入場券,然後就入去竹田城跡裡面行。竹田城跡基本上淨番個遺址喺度,個城就冇咗。入面其實都冇特別野望到,加上落雨,我相信自己都喺舊雲裡面,因為根本望唔到周圍嘅景色,淨係白矇矇一片。係間中見到啲雲散咗少少嘅時候見到地面兵庫縣但馬市嘅景色,其他嘅都冇咩嘢望到。

之後有個職員作導遊介紹城跡嘅事,其實真正望到天空之城應該喺對面嘅山望番嚟先會見到呢個畫面。山上不斷有人嚟,雖然多唔多。雨勢都冇減少到,全程都要擔住遮嚟行,加上個地下好多水談不上,同埋條路都有啲泥漿,好在自己都著咗對水靴,唔係對鞋同條褲濕得好緊要。

 

其實都冇咩特別嘢再睇,走嘅沿途買咗啲紀念品就搭巴士離開。

 

特別觀光列車

 

基本上竹田城跡真係冇特別吸引地方,反而係走嘅時候,搭返JR時,竟然係一架特別觀光列車嚟,而且一日得一班,好驚喜。初初都唔知有呢款特別列車坐,算係呢次落雨嘅行程裡面俾番啲安慰。

 

列席得一卡,裡面裝橫都好靚,啲座位設計係向住個窗,坐落去可以直接望到窗外景色。如果加埋杯嘢飲,一路望住風景感覺就非常正喇。

出發去姬路城

 

嚟得姬路市當然要嚟姬路城走一趟。喺吉野家食完之後就行去姬路城,由JR姬路站去姬路城大約十五分鐘,去到周邊地方有好多商舖賣旅遊紀念品。

行到城嘅門口都好多人喺度,始終姬路城係日本嘅國寶嚟,而且亦都係日本最大嘅城嚟。喺城裡面都好大,有個好闊嘅廣場喺度,遠望就係姬路城。姬路城外型比其他嘅大好多,外牆顏色係白色,望落又宏偉又潔白。

當入去城嘅中間位置,人流好多,仲要打蛇餅先逐步入到裡面。喺裡面個個都係跟指示由最低行上去最高點然後再落番嚟,而且要跟住大隊去行,入去城之前必須除晒鞋先可以入去。其實喺上面太多喇,有種走馬看花嘅感覺,而且都幾迫,所以行到最高落返嚟之後我就走,感覺醒上係得個迫字。

然後我再返去神戶市行吓啲商店街,再去一個地下全部都係食嘢嘅地方搵間嘢食,當夜晚餐飯,臨上飛機前食飽先走。

最後揀咗間食漢堡扒嘅鐵板餐嚟食,個老闆係兩公婆嚟。見我唔識日文就問我邊度嚟,當中大家都又簡單嘅對話,幾開心。

食完之後就搭返JR返機場,結束兩日制嘅KANSAI TRAVEL FOCUS 1嘅行程。

 

後記

 

連續喺2015年嘅7月同月都飛咗三次兩日制嘅日本遊,其實都幾趕同辛苦,嚟緊嘅一次會係正常返幾日嘅旅行。不過,咁樣都係一個幾好嘅體驗嚟。

 

 ====================

 

外部連結

====================


自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 – 12/2016) ,分開17次時間,唔識日文情況下,自己一個人遊歷日本47個都道府縣。

 ☞ http://blog.ulifestyle.com.hk/blogger/ao37182/?p=2922849


​  

☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢! ☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。

有關各種關西地區嘅鐵路周遊券可以CLICK入去睇。

 http://blog.ulifestyle.com.hk/blogger/ao37182/?p=2936671

arrow
arrow

    ao37182557 發表在 痞客邦 留言(0) 人氣()