日本鐵路周遊券介紹 : 名古屋/伊勢/松阪/大阪/和歌山【伊勢，熊野，和歌山地區周遊券】－青青一個人制霸日本都道府縣

【伊勢，熊野，和歌山地區周遊券】

☞ JR東海同JR西日本合作推出一張暢遊名古屋到大阪嘅周遊券，叫【伊勢，熊野，和歌山地區周遊券】，而且可以去埋有世界文化遺產嘅伊勢神宮，當然仲可以食到三大和牛嘅松阪牛。

除咗名古屋市同伊勢志摩外，仲有三重縣嘅地區，包括鈴鹿地區舉行方程式賽車比賽，熊野市等地區。亦可以去埋和歌山縣嘅地區，包括白濱溫泉，那智大社嘅地方。

有一呢張周遊券，連續五日可以去大阪，奈良，和歌山，伊勢同名古屋呢五大旅遊熱點。

☞ 周遊券價錢：

11，000円 (大人) ，5,500円 (兒童)

☞ 有效期間：

開始使用周遊券嘅連續五日時間

☞ 鐵路及巴士範圍：

鐵路：區域指定範圍JR，和歌山電鐵線（和歌山站～貴志站）。
巴士：三重交通巴士前往伊勢神宮，熊野交通巴士前往那智大社。

注意：

可以喺JR票務處訂特急指定席列席四次，如超出四次，亦可以搭特急列車嘅自由席。唯往返關西機場特急指定席除外，要乘搭往返關西機場嘅特急列車可以選擇自由席。
呢張周遊券唔包括去京都地方。
呢張周遊券只可以喺香港旅遊代理公司購買兌換券，然後到達日本後到JR票務處換領周遊券。喺日本當地無法即時購買。
唔包括乘搭任何新幹線。

【心得】

☞ 近期多香港人玩大阪之外，亦都會去埋名古屋玩。之前都好好少有一張周遊券係可以由大阪去名古屋，係2016年JR推出呢款周遊券就可以方便好多玩晒兩邊嘅遊客。

☞ 呢張周遊券都好超值，因為搭三次特急列車都會回到本，而且仲包埋一啲巴士例如去伊勢神宮，那智大社嘅巴士，非常方便。仲可以連續用五日添，計劃一個五日行程，又可以去和歌山，又可以去食松阪牛，又可以去埋名古屋同大阪購物，真係非常抵用。

☞ 值得留意另一款由近畿鐵路出嘅周遊券，叫【KINTETSU RAIL PASS】，都係同樣有五日有效來往大阪，奈良，伊勢同名古屋。呢張價錢係4800円，相對【伊勢，熊野，和歌山地區周遊券】平約6000円。但【KINTETSU RAIL PASS】唔包括和歌山縣嘅地區，亦都唔包括往返關西機場嘅列車，同埋乘搭特急列車係需要額外俾錢。

☞ 整體上加埋額外嘅錢同用埋【KINTETSU RAIL PASS】，相比【伊勢，熊野，和歌山地區周遊券】其實差唔多。反而【伊勢，熊野，和歌山地區周遊券】會方便好多，因為搭特急列車一張PASS都可以搞掂，唔使排隊等換特急車票。

☞ 簡單嚟講方便慳時間就係用【伊勢，熊野，和歌山地區周遊券】，如果要平嘅就係用【KINTETSU RAIL PASS】。