【Kansai Travel Focus 1 – Day1】2015-09-17 [值得嚟嘅程度 LEVEL 11/12]
完成咗兩次嘅兩日嘅關東地區，決定兩個星期後又再嚟，去返關西地方，而今次制霸嘅都道府縣會係奈良縣同兵庫縣。
【進入日本境內俾海關查問】
☞ 一如既往都係出發去到關西機場，當準備入境，經海關嘅地方時候，其中一個職員去檢查時問我，去幾多日。我自然用英文答係去2日，再問我嚟呢度目的係咩，然後我再搭佢我喺嚟觀光。不過佢一路問一路CHECK我PASSPORT，就話我城期之前先嚟過又再去嘅。我就話我自己好鐘意日本，目的都係黎觀光。
☞ 當時自己開始緊張，諗係唔係去得密唔俾我入境呢。之後個職員叫我打開啲行李俾佢睇，而嗰陣都係得一個背囊，其中佢拎起我相機腳架問係咩嚟，我直接講係影相嘅腳架嚟，而我都除埋個套俾佢睇。個職員望完之後就俾返PASSPORT我可以入境。
☞ 其實真係好令人懷疑嘅，咁密而且去得兩日，俾人係咁問都合理嘅。
【直接出發去奈良公園】
搞掂晒，換埋張JR PASS就坐車去奈良先，大概一個鐘就到JR奈良站。發覺原來奈良市都好清靜好舒服。因為行程唔太趕，所以步伐可以慢落嚟，去咗附近餐廳食碗牛肉飯先。
嚟奈良公園最大嘅活動都係睇鹿，但自己對於睇鹿並冇特別興趣，反而比較想去係奈良公園上面嘅若草山。睇書講可以經奈良公園之後行上山，當到達山上就可以眺望整個奈良市。
由JR站地面行去奈良公園要十五分鐘左右，沿途嘅舖頭部份都冇開門。到某一個位就見到一個池嘅位置，叫猿沢池，就應該距離奈良公園不遠矣。個池望落去都幾靚，加上好天，池水面反光，慢慢咁行都幾舒服。
不過當沿大路上去奈良公園，發覺好多人，寧靜氣氛都即時冇晒。去到興福寺途人都唔少，但仲有唔少得嘅係啲鹿。行人去好多鹿從四周圍係咁行過，亦都有好多途人經過去餵鹿食嘢。
初初自己望到啲鹿都幾得意，摸佢哋都幾舒服，不過當佢哋行埋知冇嘢食，嗰樣好好似有啲不悅咁，或者鹿俾人感覺有關啲冷漠，表情唔多。
之後向若草山出發，離開所謂寺廟地方，一路直接行，沿途都仲有好多人，係去到奈良公園呢個地方，發現個公園非常大，好空曠，極度適合去野餐。喺嗰度感覺非常舒服，而且開始冇咩人喺度。當時覺得咁靚嘅地方反而仲少人，可能係冇鹿睇，因為嗰公園唔再發現到有鹿喺度，但真心個公園真係好靚呀。
【向若草山出發】
雖然奈良公園靚，但目標都係山上面嘅地方，所以逗留一陣出發去若草山。不過，喺奈良公園度比較難揾到指示上若草山，自己不停兜咗個公園先揾到個指示，但並非上山路線，只係話你知若草山嘅方向。揾咗陣終於知個入口位喺邊，然後沿山路上大約二十分鐘就上到去。雖然路唔難行，但都有啲辛苦不斷向上行，行到自己都有啲扯氣。
【若草山一重目，二重目，三重目】
一上到去就係【若草山一重目】，發覺一大遍草地平原，好靚，但因為係山上面，自己企喺位置係斜斜地，感覺好特別，兩旁都有啲木櫈可以坐落嚟慢慢欣賞奈良市嘅面貌。加上周圍冇咩人，只有一家日本人同買少量嘅外國遊客，感覺好清靜，好舒服，自己一坐落嚟休息都唔捨得起身。
休息完之後繼續上上面，目標係上到最高嘅三重目。行上去都係比較平嘅斜路嚟，所以唔係咁難行。好快去到二重目，不過呢個地方就比較細，企嘅位置只係一個展望台般嘅地方，所以都係繼續向前行。
去到臨到三重目嘅地方前，有一個COUNTER會查飛係唔已經係地下買咗飛上嚟。睇原經過個閘繼續行去就會係三重目嘅地方嚟。
上到三重目非常驚起見到鹿喺上面出現番，因為初初由奈良公園開始係再冇見到有鹿嘅出沒，而一直行上山嘅中途都冇見到鹿嘅出現，但到山頂嘅位置竟然出現返，太神奇喇。不過後來先知原來後面係有一條山路係可以上嚟若草山嘅三重目呢個位。
喺呢個山頂上望整個奈良市都幾靚，加埋鹿仔喺度，好似感覺到奈良真正睇鹿原來眾有呢個若草山上。呢度除咗由山腳行上嚟之外，亦都可以由山上面嘅車路上嚟，所有都有啲遊客係另一面嚟。
景色好靚，由山上高處望啲鹿仔周圍走，同之前喺地面望到嘅係兩種感覺，喺山上會係舒服寫意啲。
之後就有班類似泰國嘅後生仔女嚟咗，不過佢哋就拎住部收音機開住歌就播。雖然可能係佢哋喺當地郊遊嘅文化嚟，但都始終影響其他人，所以嗰陣寧靜嘅環境都被破壞咗。但係，望到一班年輕嘅後生仔女，呢啲就係程春嚟嘅，而我睇到嘅係大家都好開心，好歡喜呢度，其實，都幾快樂嘅。
逗留咗一陣就離開，沿路落返去奈良公園，去咗一間食店食埋嘢之後就走。沿路近手信區嘅位置，開始有見返剛才嘅鹿仔，同埋見到好多遊客周圍同啲鹿仔一齊玩。可能都係晏晝嘅時間，所以周圍嘅人比朝早多好多，而且係有種迫嘅感覺。
【去京都市行街】
之前KANSAI WONDER QUEST雖然有好多日都係去京都府，但實際京都市就冇咩點行過。搭JR由奈良站去返京都站都係半個鐘時間。
當去到京都站真係水洩不通，好多人，而且佢哋啲腳步好急。自己去咗一間AEON大商場行陣，都好靚，唔似香港嘅AEON，佢真係一間大廣場嘅模式，行得幾舒服，可能係唔多人行。
【去食神戶牛】
到夜晚就去神戶食夜晚嗰餐，嚟到當然係去食神戶牛。去咗三宮站附近叫STEAKLAND去食，好好彩唔洗點排就可以上樓有得食。
去到係同其他人一齊圍住坐，中間係個爐嚟，會因應你叫嘅餐幫你準備燒，而我叫係海鮮加神戶牛。整個餐好豐富，有湯有飯又有海鮮同神戶牛，仲有餐飲同甜品，夾埋都係HKD600，我覺得可以接受嘅。
食完行多陣神戶市，同去埋神戶港就返姬路市瞓，準備聽日早起身。
====================
外部連結
====================
自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 – 12/2016) ，分開17次時間，唔識日文情況下，自己一個人遊歷日本47個都道府縣。
☞ http://blog.ulifestyle.com.hk/blogger/ao37182/?p=2922849
有關各種關西地區嘅鐵路周遊券可以CLICK入去睇。
留言列表
