第29章【一個人制霸日本47個都道府県】新潟県：湯沢高原 / 萬代橋 @ 青青一個人制霸日本都道府縣

【East JP Wonder Quest – Day2】2015-09-27 [值得嚟嘅程度 LEVEL 13/15]

第一次上高原嘅位置，覺得好廣闊好靚呀。

搭新幹線出發去湯澤高原

大約九點鐘由上野開始出發去越新幹線，第一次搭上越新幹線。當架列車嚟到發現原來架新幹線係有兩層。不過我感覺一般，原因係覺得外型有啲似廣深鐵路直通車嘅模樣，冇咗我平時覺得新幹線係超前衛嘅形象。不過，呢款係舊嘅新幹線嚟，當然同其他冇得比。

坐大約一個鐘左右就到越後湯澤站，開始發覺自己去咗啲好少人嘅地方，因為個車站係好大，不過冇咩人等車。以前成日以為新幹線嘅車站個個都會好似上野，大宮咁多人。

車站市集

不過落下一層大堂發現車站出口裡面有一個好大嘅地方，係一個市集，買嘅嘢大部份都係嘢食為主，種類多幾多，除咗一啲典型嘅當地手信，仲有擺放唔同當地嘅特產，好似最出名嘅新潟米，真係會有一包包米可以買，同埋好多用當地米做嘅零食例如米果。

除此之外，仲有賣好多唔同種類嘅本地酒，有梅酒同燒酒等等，整個市集相當大。而且旁邊仲有啲食店喺度，真係好方便。

街邊有人跑馬拉松？

兜咗一陣市集之後出返去車站出面，沿路行上去就會係湯澤高原嘅，大約二十分鐘會到。中途有一班人喺度跑步，而且仲係著晒運動衫去跑，旁邊有好多支持幫手打氣，就連旁邊啲舖頭負責人都出埋嚟打氣。嗰比賽應該類似係街頭馬拉松，周圍嘅路都封晒，車應該冇得行，淨返一邊嘅路可以俾行人行過。

我自己都望咗一陣雖然最後其實都唔知係咩比賽嚟，由於自己都要去湯澤高原出發，所以留咗一陣間就繼續向纜車行。

到達湯澤高原

坐纜車上去每廿分鐘一班，都唔算多人，一班纜車都係十幾人左右。纜車一路上去心情一路興奮，因為開始望到高原嘅位置，而且慢慢遠離市區，由高處俯瞰湯澤町，感覺好正。

當上到高原位置，一行出去發現好大嘅地方，整個高原好空曠，而且感覺有啲奇妙，係因為覺得咁高嘅地方咁大嘅地方，而且人嘅數目唔多。我從來冇見過呢個咁震撼嘅畫面，係嗰刻我真係有啲驚呆咗，因為冇諗過日本係有呢啲地方，對日本嘅印象有所改變。

同埋唔知應該點行先好，因為地方太大，去睇花好先，定係行上更高位嘅地方睇呢，定抑或浸腳先呢，突然諗唔到應該去做咩先。

行到高原嘅山邊望返湯澤町，一來可以望到整個湯澤町之外，我覺得最特別係可以冇欄杆係度。衰啲咁諗真係好易會碌落山，不過可能就係日本啲人守規矩先可以做到呢個效果。

湯澤高原基半上唔同季節有唔同嘢，春天同夏天可以睇花，盛開時一大堆會開晒喺你面前。而秋天可以欣賞紅葉，冬天更可以滑雪添，亦都有好多機動設施可以俾一家大細去玩。例如小型汽車，小型高爾夫球，有繩網，遊樂場等，非常多元化。

我自己先去睇吓啲花，種咗一啲紅色嘅草，形狀好似一個球咁，幾靚，不過可惜我去嘅時候唔係盛開晒。之後再一直行上高，可以以更高角度望返落湯澤高原，感覺好大。然之後再搭吊車落返低位，發覺基本上係得我一個搭。

落到高原嘅低位有一個細型嘅濕原可以行吓，雖然細，但係發覺有好多唔同品種嘅植物欣賞。而再行過旁邊少少有一個細細地嘅山仔，亦都種咗好多唔同嘅樹木同花卉。之後再行返上剛才睇紅色草嘅位置，都唔係好遠。

其實整個湯澤高原都好多設施如果要玩晒就真係要一整日啦。

發覺自己相機開唔到！？

行咗都有個幾鐘，肚餓就喺間餐廳食個晏晝飯先，叫左一個豬扒定食。個餐廳係先買飛然後拎嘢食。間餐廳到大，加上人唔算多，所以坐喺度食徊覺得好舒服，因為靜，又冇人會趕你走，食喺上嚟真係可以做到慢慢咀嚼。

一路食一路睇返相機之前啲相，但睇睇吓發覺突然開唔到，唔係冇電，而係相機感應唔到個LENS喺度，所以開唔到。其實都應該知係咩一回事，應該係去四國一次俾大風吹咗落地下，可能就咁接觸唔好。當時都驚驚地，唔知點算，話哂今次個行程都係啱啱開始咗兩日，但係仲有四日時間。無理由淨係靠手機影相嘛，咁我就上網CHECK睇我一陣想去嘅新潟市有冇得買相機，結果俾我CHECK到有間BICCAMERA喺新潟站隔離，都算好好喇，因為我唔知新潟市係唔係啲普通市區，唔係咁多商場嘅地方嚟。咁冇法之中嘅辦法嚟，當破財囉。所以食完飯即刻落返山去返JR越後湯澤站。

行返車站前都見唔到啲跑手喺度，變返晒普通嘅街道。當中行行吓發現仲有啲可以玩射擊嘅舖頭，通常係電視先見到，現實地方都可以見到真係有趣。

去新潟站整相機

由越後湯澤出發，喺剛才嘅市集行多一陣，順便買手信，而且再行入少少就見到好多精品買，可惜太貴喇。之後就再坐新幹線去到新潟站，去到都差唔多夜晚六點幾。

第一時間即刻買返部相機，其實都冇咩時間揀，舖頭收也罷八點鐘，而且我想係第二日即用到，所以唔想適應新相機，又或者係唔識調較新機。最後係買返一模一樣嘅相機，不過我用開嘅SONY ALPHA 5000就冇晒貨，要買新一級嘅SONY ALPHA 5100。時間跟逼最後都冇點研究就買嚟用，記得機連鏡要68，000日圓，真係為港幣都要4500蚊，真係失晒預算。

前往去萬代橋

既然買完相機，有時間就去買新潟市一個睇夜景嘅地方，萬代橋。其實有巴士應該可以由新潟站去萬代橋，不過行過去都係廿分鐘，又唔係趕時間，所以就行去睇。喺嗰陣我部舊相機又突然用得返，不過呢啲錢唔慳得，因為都唔知幾時再壞咁就麻煩喇。

沿住大路一直行十五分鐘就見到萬代橋，新潟市都係一個較為繁盛嘅地方，大街側面都有好得百貨商店同埋食店。到達萬代橋就見到對面嘅橋都著咗燈，望落去幾靚，不過真正要睇晒整個夜景就要再行多十五分鐘，去日航新潟既中間樓層去望整個萬代橋同信濃川，咁就真係靚好多喇。

由萬代橋去日航新潟酒店雖然有啲遠，不過沿途自己一個慢慢行去都好寫意，加上當日係中秋節正日，喺日本見到個越亮都覺得好靚，超圓超清。

喺日航新潟酒店一望住夜景一邊坐落嚟食住夜晚嗰餐飯，感覺好陶醉，至少喺香港都難以咁容易搵到呢啲咁令人享受嘅地方。

相機嘅MEMORY CARD內容冇晒

大約九點左右我就行返去新潟站搭新幹線返去上野，當返到上野嘅酒店，諗住試部新相機影相，咁入咗喺舊相機用緊嘅MEMORY CARD，想試吓影唔影到嘢。不過一開機就一大堆日文嚟，我以為係一開始部新相機要造SETTING，問咗好多嘢同㩒好多確定去啟動部新相機。

新相機係得日文，係冇其他語言可以揀，咁用慣亦都冇所謂，但當中一個程式要我確認嘅時候，我唔清楚佢問咩，但我照確認。喺呢個時候，個相機嘅螢幕齣現一條BAR，而且LOAD咗一段時間，突然我覺得唔妥，好似係洗走我之前影啲相咁，結果原來係格式化我張MEMORY CARD，即係剷晒我之前啲相，包括前日去過箱根同當日喺湯澤高原影嘅所有相。

OH MY GOD，但最後都真係無晒，救唔返。依加見到嘅相係手機嘅相嚟，真係破費買相機仲要冇埋啲相，當時真係好失落。。。但一切係事實嚟。

湯沢高原管方網頁：http://www.yuzawakogen.com/index_02.php

前往湯沢高原可以使用以下由JR東日本推出嘅【JR東京廣域周遊券】，可以連續三日使用上越新幹線前往湯沢高原。由東京去越後湯沢正價都要6,150円，但呢一張周遊券只需要10，000円可連續三日除咗去湯沢高原之外，亦都可以去埋其他東京都區域，以及其他縣各地方，包括軽井沢，日光，横浜，熱海，以及成田國際機場同羽田國際機場。

對於前往東京近郊地區同關東地方嘅旅客非常超值。