第24章【一個人制霸日本47個都道府縣】長野県：軽井沢 @ 青青一個人制霸日本都道府縣

【Kanto Travel Focus 2 – Day1】2015-08-15 [值得嚟嘅程度 LEVEL 9/12]

☞ 自從上一次飛咗兩日日本之後，可能真係有少少上咗癮，所以到下一個月（2015年8月）又再次飛去日本，實行第二次兩日製嘅日本旅遊，命為【KANTO TRAVEL FOCUS 2】。

☞ 今次會去返去上一次瞓過龍嘅栃木県嘅戦場ヶ原，同埋去政制霸新一個県，長野県。去長野県先揀咗軽井沢，去一啲輕鬆嘅地方欣賞，而第二日去返栃木県嘅戦場ヶ原，就咁計劃兩日嘅日本旅行。

【出發去軽井沢】

☞ 呢次同上一次兩日制嘅日本旅行一樣，都係搭凌晨機，坐香草航空到成田國際機場。當到達機場過關嘅時候，其中一個職員用英文問我去邊。我想講去軽井沢，不過我唔記得軽井沢嘅英文點讀，淨記得有KA同ZAWA嘅讀音。最後個職員就文我係唔係KARUIZAWA，咁我話係呀，所以我依一直都好記得軽井沢個英文拼音係KARUIZAWA。

☞ 去到買張三日嘅KANTOAREAPASS，不過都多人排隊，都要排三個字時間。之後買咗將周遊券就搭JR去返東京先，然後再轉新幹線去軽井沢。軽井沢距離東京大約坐一個鐘多少少時間嘅新幹線，因為始終係另一個県，相當遠，初初聽軽井沢仲以為係東京附近地方嚟，不過有呢將關東周遊券就包埋新幹線去軽井沢。

【白糸の滝】

☞ 去軽井沢由東京坐北陸新幹線，車箱都非常靚，原來嗰陣呢條新幹線只係開咗冇耐，內部嘅坐位係深紅色，好靚，不過原來都多人搭。去到軽井沢要轉巴士先去到大街市集嘅位置叫旧軽井沢（舊軽井沢），嗰度都好多人去行，而且都多單車舖租單車，不過我鐘意郊區嘅地方就去咗再入啲嘅白糸の滝（白糸瀑布）。

☞ 落車行十分鐘就到，其實白糸の滝係一個細嘅瀑布嚟，不過特別在於瀑布範圍大，好似好多條瀑布流落嚟，所以稱之為白糸。不過我覺得唔係咁特別，如果冇旅遊介紹，去到我覺得似山區記流水，而且只係望一陣已經望晒，唔覺好有特色。所以留咗一陣我都走，一來要型到影晒，二來都好多人，畢竟佢嘅範圍唔大。

【雲場池】

☞ 之後就去對面舖頭買啲手信，同食咗個幾好食嘅桃，然後搭巴士去返旧軽井沢。旧軽井沢度有個景點可以去，叫雲場池，不過如果行去真係有啲難度。多數介紹去呢個雲場池係踩單車去，但當我見到條街咁多人都唔想去租單車踩。睇過地圖去雲場池要廿分鐘，所以我決定行過去。

☞ 雖然有地圖望住行，但行行吓都蕩失路，方向係啱，但唔知條路行緊係地圖嘅邊條街。其實都安全，附近多民居住，亦都有舖頭開檔，不過冇大街嗰邊咁多人。沿途都可以見到好多特色舖頭，例如買佢哋自家制作嘅手工品，咖啡店，花店等都值得睇吓，但我最想快啲去到雲場池呢個地方。

☞ 最後行左半個鐘左右去到，係兜遠咗少少路，始終啲路牌唔多。去到雲場池望到其實係一個池塘，不過就好清，個倒影將兩邊樹林清楚反射出嚟，不過可惜嘅係，原來雲池場最靚嘅地方就淨係呢度，再圍住個池塘其實都冇特別嘢睇到，只係行到尾有間CAFE可以休息吓。

【去CAFE休息下，食個TEA，慢行軽井沢歐陸式舖頭】

☞ 我自己影咗一陣相都離開雲場池，自己都行咗好耐，所以揾間CAFE坐吓休息吓先，始終覺得嚟軽井沢點都要感受吓優閒輕鬆嘅體驗。去到一個市集，不過都係好有歐陸式風味，慢慢行睇啲精品都幾唔錯。然後再入間CAFE慢慢飲杯CAFE，再ORDER個熱香餅，不過個份量就大咗啲，有啲食唔晒嘅感覺。間CAFE唔多人，而且佈置都好有特色，旁邊擺咗座鋼琴喺度，有啲顧客間中會去彈琴，幾有趣。喺間CAFE慢慢坐其實感覺好好，俾到自己一個人心靈上一種寧靜，而且可以放低緊張，一切變得緩慢，自己一個咁樣都好舒服，而且感覺都有啲奢侈。